सावन मनभावन
-----------------------------------
सावन के रिमझिम पानी
उल्हा भाजी आनी-बानी।
का सुरूज लुका गय कोनहा मं
केकरा के बिला सब धनहा मं।
टीकरा मं उबजे कउँवा-कानी
टपटप चुहय ओरिया-छानी।
चारो कोति फूटू-पीहरी
इंदर के छलकत हे गगरी
आलू अउ गोंदली सरत हवंय
नदिया के मछरी मरत हवंय।
येती ओती चिखले चिखला
रच गय काई माते बिछला।
हरियागे कोरा धरती के
पीकिया गय पाना हरदी के।
बेल रूखवा के कोंवर पाना
दूध मोंगरा फूल चाउंर दाना।
भोले बाबा मं चघाना हे
कावरिया बन के जाना हे।
झुलना आमा मं बँधा गे हे
राखी बंधना लकठा गे हे।
मोरो मनमोहन आ गे हे
सावन मनभावन भा गे हे।।
       ====00====
                  --परसराम चंद्राकर 'प्यासा'
           गांव-रेंगाबोड,पो.-महली,
       तह.-पंडरिया,जिला-कबीरधाम(छ.ग.)
                     मो.-9630960305 
                          7587305180